کراچی : وزیراعلیٰ سندھ سید مراد علی شاہ نے ہفتہ کے روز وزیراعلیٰ ہاؤس میں انسداد کرونا سے متعلق صوبائی ٹاسک فورس اجلاس کی صدارت کرتے ہوئے کل (21 جون) سے پرائمری اسکولز کھولنے کا فیصلہ کیا ہے جبکہ28 جون سے مزارات، تفریحی پارکس، جم اور سوئمنگ پول بھی کھل جائیں گے۔ ویکسین ڈوزز کی کمی کے باعث ویکسی نیشن مراکز صرف اتوار (کل) کو بند ہوں گے۔ اجلاس میں صوبائی وزرا، ڈاکٹر عذرا فضل، سعید غنی، ناصر شاہ، مشیر قانون مرتضی وہاب، پارلیمانی سیکرٹری قاسم سراج سومرو، چیف سکریٹری، آئی جی پولیس، اے سی ایس ہوم، وزیراعلیٰ سندھ کے پرنسپل سیکریٹری، ایڈیشنل آئی جی کراچی، سیکرٹری خزانہ حسن نقوی اور سیکرٹری اسکول ایجوکیشن احمد بخش ناریجو، سیکرٹری انڈسٹریز ریاض الدین، ڈاکٹر باری، ڈاکٹر فیصل، ڈبلیو ایچ او کی ڈاکٹر سارہ، ڈاکٹر قیصر سجاد اور کور5، رینجرز اور دیگر اداروں کے نمائندوں نے شرکت کی۔ محکمہ صحت نے ٹاسک فورس اراکین کو بریفنگ دیتے ہوئے کہا کہ 18 جون کو 13970 ٹیسٹ کئے گئے تھے
جن میں سے542 کیسز کا پتہ چلا جوکہ 3.9 فیصد تشخیصی شرح بنتی ہے۔ اس پر وزیراعلیٰ سندھ نے کہا کہ مجموعی طور پر تشخیصی شرح کم ہوگئی ہے لیکن صرف کراچی میں ہی 8.8 فیصد تشخیصی شرح ہے۔ انہوں نے کہا جن اضلاع میں شرح کم ہے ان میں ضلع شرقی کی شرح14 فیصد، ضلع جنوبی10 فیصد، ضلع وسطی9 فیصد، ضلع کورنگی اور ضلع ملیر7 فیصد اور سکھر میں بھی7 فیصد شرح پائی گئی ہے۔ اجلا س کو بتایا گیا کہ کرونا وائرس سے شروع ہونے والے ایک ہفتہ کے دوران سندھ میں82 اموات ہوئیں۔ ان میں سے کراچی شرقی25 اموات ، ضلع وسطی 25، ضلع کورنگی8، ضلع جنوبی اور ضلع غربی میں6 اور سکھر 4 ہلاکتیں ہوئیں۔3 سے 18جون تک 263 مریض انتقال کرچکے ہیں ان میں 75 فیصد یعنی151 وینٹی لیٹرز پر،19 فیصد یعنی49 وینٹی لیٹر سے ختم اور24 فیصد یعنی 63 گھروں میں ہیں۔ اجلاس کو بتایا گیا
کہ جناح ٹرمینل پر اب تک42532 مسافر آئے جن میں سے 95 کا ٹیسٹ کرنے پر انکا ٹیسٹ مثبت پایا گیا۔ اجلاس کو بتایا گیا کہ اب تک ویکسین کی3243988 ڈوززموصول ہوچکی ہیں جن میں سے2873857 استعمال ہوچکی اور صرف370141 اسٹاک میں موجود ہیں۔ وزیراعلیٰ سندھ نے ویکسین کے دستیاب ذخیرہ کو مدنظر رکھتے ہوئے صرف اتوار (20 جون) کو تمام ویکسی نیشن مراکز بند رکھنے کا فیصلہ کیا۔ وزیر صحت ڈاکٹر عذرا فضل پیچوہو نے کہا کہ وفاقی حکومت نے ان کے محکمے کو آگاہ کردیا ہے کہ سپتونک ویکسین سندھ کو جون کے آخری ہفتے یا جولائی کے پہلے ہفتے میں فراہم کی جائے گی۔ انہوں نے مزید کہا کہ21 جون کو سائنوویک کی15لاکھ ڈوزز، کسینو کی7 لاکھ اور پاک ویک کی4 لاکھ ڈوزز23 جون کو فراہم کی جائیں گی
اس پر وزیر اعلیٰ سندھ نے کہا کہ اگلے ہفتے سے ویکسی نیشن مہم کو تیز کرنے کیلئے کافی مقدار میں خوراکیں وصول کی جائیں گی۔ وزیراعلیٰ سندھ سید مراد علی شاہ نے ٹاسک فورس اراکین کے ساتھ مکمل گفتگو کے بعد28 جون سے مزارات، انڈور جیمز، سوئمنگ پول اور تفریحی پارکس کھولنے کا فیصلہ کیا ہے تاکہ سماجی فاصلے کو یقینی بنانے جیسے کچھ شرائط کو پورا کیا جاسکے۔ کوویڈ کی صورتحال کا 28 جون2021 کو دوبارہ جائزہ لیا جائے گا۔