سہیل انور سیال، نثارکھوڑو، ہری رام شامل، سعید غنی سے تعلیم، ناصر شاہ سے اطلاعات کا قلمدان واپس لیا جاسکتاہے
وزیراعلیٰ کی پیپلز پارٹی کی اعلیٰ قیادت سے مشاورت مکمل، نئے وزرا کی تقریب حلف برداری آج گورنرہائوس کراچی میں ہوگی
کراچی :سندھ کابینہ میں تبدیلی کا فیصلہ کرلیا گیا ہے۔ اطلاعات کے مطابق موجودہ کابینہ سے تین وزرا اور ایک مشیر کی چھٹی کا امکان ہے جبکہ کچھ وزرا کے قلمدان تبدیل کردئے جائیںگے۔
حکومت سندھ کے باخبر ذرائع کا کہناہے کہ وزیراعلیٰ سندھ سید مراد علی شاہ نے پیپلز پارٹی کی اعلیٰ قیادت سے کابینہ میں ردوبدل کے حوالے سے مشاورت مکمل کرلی ہے۔ بتایا جاتاہے کہ سہیل انورسیال، نثاراحمدکھوڑو اور ہری رام کو سندھ کابینہ سے فارغ کئے جانے کا امکان ہے جبکہ سعید غنی سے محکمہ تعلیم اور سیدناصر حسین شاہ سے اطلاعات کا قلمدان واپس لیا جاسکتاہے۔ سردار شاہ کو وزیرتعلیم اور سعید غنی کو وزیراطلاعات بنانے کی توقع ہے۔
ذرائع کاکہناہے کہ اسماعیل راہو سے زراعت اور تیمور تالپور سے انفارمیشن ٹیکنالوجی کا قلمدان واپس لینے کا اصولی طور پرفیصلہ کرلیا گیا ہے۔ تبدیل شدہ کابینہ میںجام خان شورو،گیان چند، ضیا عباس کو صوبائی وزیر بنایا جائیگا۔ ضیا عباس کو وزیر آبپاشی اور جام خان شوروکو ورکس اینڈ سروسزکے قلمدان ملنے کا امکان ہے۔
اطلاعات ہیںکہ جام اکرام دھاریجو سے اینٹی کرپشن کا قلمدان واپس لے لیا جائیگا، معاون خصوصی بنگل خان مہرکو اینٹی کرپشن کا قلمدان دئے جانے کا امکان ہے جبکہ صوبائی وزیر اسماعیل راہوکو یونیورسٹیز اینڈ بورڈز اور محکمہ ماحولیات کا قلمدان دئے جانے کی توقع ہے۔ مکیش کمار کو خوراک اورگیان چند کو اقلیتی امور کا قلمدان دیاجاسکتا ہے۔ تیمور تالپور کو وزیر جنگلات بنایاجائیگا۔ اسی طرح تنزیلہ قمبرانی کو وزیراعلیٰ کا معاون خصوصی برائے انفارمیشن ٹیکنالوجی بنانے پر غور ہورہاہے۔
منظور وسان کو وزیراعلی کا مشیر زراعت بنانے کا امکان ہے۔ حکومت سندھ نے وزیراعلیٰ کے پانچ معاونین خصوصی مقررکرنے کا فیصلہ بھی کرلیاہے۔ نئی کابینہ میںریاض شیرازی، رسول بخش چانڈیو،ارباب لطف اللہ کو وزیراعلیٰ کا معاون خصوصی بنایا جائیگا۔ ساجد جوکھیو کو صوبائی وزیر سماجی بہبود بنائے جانے کا امکان ہے۔
لیاقت آسکانی ایاز مہر کو بھی سندھ کابینہ میں نمائندگی دی جاسکتی ہے۔ ذرائع کا کہناہے کہ سندھ کابینہ میں شامل کئے جانے والے نئے وزرا کی تقریب حلف برداری (آج)جمعرات کی شام سات بجے گورنرہائوس کراچی میں ہوگی۔
گورنر سندھ عمران اسماعیل وزرا سے حلف لیںگے۔