کراچی (اسٹاف رپورٹر) شہر میں ڈکیتی مزاحمت کے دوران فائرنگ سے ایک شخص جاں بحق جبکہ تین زخمی ہوگئے ہیں۔ تفصیلات کے مطابق ڈسٹرکٹ سینٹرل کے علاقے نارتھ ناظم آباد بلاک ایم میں ڈکیتی کے دوران ڈاکوؤں کی فائرنگ سے شدید زخمی ہونے والے سعد انیس الرحمٰن نے دوران زخموں کی تاب نہ لاتے ہوئے دم توڑ دیا۔
ڈکیتی کے دوران مزاحمت پر فائرنگ کا واقعہ 7 اگست کو تیموریہ تھانے کی حدود میں قائم بیکری کے اندر پیش آیا تھا جبکہ مقتول کو سر پر گولی لگی تھی۔ تیموریہ پولیس نے ضابطے کی کارروائی کے بعد لاش ورثا کے حوالے کر دی۔
قبل ازیں اسٹیل ٹاؤن کے علاقے نیشنل ہائی وے گھگھر پھاٹک سخی ٹول پلازہ کے قریب موٹر سائیکل سوار ڈاکوؤں کی فائرنگ سے35 سالہ خادم حسین زخمی ہوگیا۔ بنارس پل کے نیچے نامعلوم ملزمان کی فائرنگ سے 35سالہ نور خان زخمی ہوگیا۔