جنرل عاصم منیر کی پی ایل اے آرمی کمانڈر سے تفصیلی ملاقات، سکیورٹی امور، فوجی تعاون پر تبادلہ خیال: آئی ایس پی آر
راولپنڈی : آرمی چیف جنرل عاصم منیر چار روزہ سرکاری دورے پر چین پہنچ گئے جہاں ان کا پرتپاک استقبال کیا گیا۔
پاک فوج کے شعبہ تعلقات عامہ (آئی ایس پی آر)کے مطابق پاک فوج کے سربراہ جنرل عاصم منیر کو پی ایل اے آرمی ہیڈ کوارٹرز میں گارڈ آف آنر پیش کیا گیا۔ سپہ سالار کی پی ایل اے آرمی کمانڈر سے تفصیلی ملاقات ہوئی،
جس میں سکیورٹی امور اور فوجی تعاون پر بات چیت کی گئی، ملاقات میں دونوں جانب سے خطے میں امن و استحکام کی ضرورت پر زور دیا گیا جبکہ دونوں افواج میں تعاون بڑھانے پر بھی اتفاق کیا گیا۔
آرمی چیف نے پی ایل اے کے جوانوں کی آپریشنل صلاحیتوں کا بھی معائنہ کیا، آرمی چیف نے جوانوں کی پیشہ ورانہ صلاحیتوں اور تربیتی معیار کو سراہا۔
بتایا گیا ہے کہ آرمی چیف چین کی مزید عسکری قیادت سے بھی ملاقاتیں کریں گے، ملاقاتوں میں دونوں ممالک کی مسلح افواج میں تعاون بڑھانے پر بات ہو گی۔