ایئر بس اور سی130ہرکولیس طیارے سوڈان سے جدہ کے راستے پاکستانیوں کے انخلا میں مصروف عمل ہیں
مصیبت میں گھرے پاکستانیوں کی بحفاظت وطن واپسی تک فضائیہ آپریشنز کا سلسلہ جاری رہے گا: دفتر خارجہ
کراچی:پاک فضائیہ کا دوسرا طیارہ سوڈان سے 149پاکستانیوں کو لے کر کراچی پہنچ گیا۔ ترجمان دفتر خارجہ کے مطابق پاک فضائیہ کے ایئر بس اور سی130ہرکولیس طیارے سوڈان سے جدہ کے راستے پاکستانیوں کے انخلا میں مصروف عمل ہیں۔
وزیر اعظم کی ہدایت پر سربراہ پاک فضائیہ نے ٹرانسپورٹ فلیٹ کو سوڈان میں پھنسے پاکستانیوں کے انخلا کے احکامات جاری کئے۔ پاک فضائیہ وزارت خارجہ اور سوڈان و سعودی عرب میں پاکستانی سفارتخانوں کے ساتھ مل کر پھنسے ہوئے پاکستانیوں کی وطن واپسی کے لیے ہر ممکن کوششیں کر رہی ہے۔
پورٹ سوڈان نیو انٹرنیشنل ایئرپورٹ سے ریسکیو کئے گئے پاکستانیوں کو پاک فضائیہ کے ٹرانسپورٹ طیاروں کے ذریعے منتقل کیا جا رہا ہے۔ ترجمان کے مطابق پاک فضائیہ مصیبت میں گھرے پاکستانی بھائیوں اور بہنوں کی بحفاظت وطن واپسی تک اپنے آپریشنز کا سلسلہ جاری رکھے گی۔
دوسری جانب وزیراعظم شہباز شریف نے سوڈان سے پاکستانیوں کے انخلا کی کوششوں پر پوری ٹیم کو شاباش دی ہے۔ انہوں نے پاکستانیوں کی واپسی کے آپریشن میں شریک آئی ایس آئی سمیت تمام فورسز کو خراج تحسین پیش کیا۔