راولپنڈی: آرمی چیف جنرل سید عاصم منیر سے 9 مختلف ممالک سے تعلق رکھنے والے ہارورڈ یونیورسٹی، امریکہ کے 38 طلباء کے ایک گروپ نے جی ایچ کیو میں ملاقات کی۔
آئی ایس پی آر کے مطابق ملاقات میں آرمی چیف نے علاقائی سکیورٹی ایشوز پر بات کی، جنرل عاصم منیر نے خطے میں امن و استحکام کیلئے کے پاک فوج کے کردار پر بھی اظہار خیال کیا،انہوں نے کہا کہ پاکستان دہشت گردی کے خلاف مضبوط کردار ادا کر رہا ہے،
عالمی برادری کو پاکستان کی جانب سے دی گئی بے پناہ قربانیوں کا ادراک کرنا چاہیے۔ انٹرایکٹو سیشن کے دوران آرمی چیف نے علاقائی سلامتی کے مسائل اور خطے میں امن و استحکام کو فروغ دینے کے لیے پاک فوج کے کردار پر بات کی،پاکستان کی بھرپور صلاحیتوں پر روشنی ڈالی اور شرکاء پر زور دیا کہ وہ اپنے قیام کے دوران اپنے تجربات کی بنیاد پر پاکستان کو دیکھیں۔
آرمی چیف نے مقبوضہ کشمیر میں ہونے والے انسانی مظالم اور حقائق کو تبدیل کرنے کی کوششوں پر بھی روشنی ڈالی۔ طلباء نے بات چیت کا موقع فراہم کرنے پر آرمی چیف کی تعریف کرتے ہوئے ان کا شکریہ ادا کیا۔