کراچی : ایف آئی اے نے ملک کی معاشی بدحالی کے ذمہ داروں کے گرد گھیرا تنگ کرنے کے لئے اہم شخصیات کو بیرون ملک جانے سے روکنے کے لئے اسٹاپ لسٹ میں اضافہ کر دیا گیا ہے۔
ایف آئی اے ذرائع کے مطابق اسٹاپ لسٹ میں شامل ناموں کی تعداد ایک ہزار سے تجاوز کرگئی ہے ۔ابتدائی طور اسٹاپ لسٹ میں اعلی ترین عہدوں پر فائز شخصیات کے بجائے ان کے ساتھ تعینات شریک کار افراد کے نام بھی شامل کر لئے گئے ہیں۔
ذرائع کا یہ بھی بتانا ہے کہ اسٹاپ لسٹ میں سابق وزیر اعلی سندھ اور سابق وزیر خارجہ بلاول بھٹو کے قریبی ساتھیوں اور افسران کے نام شامل ہیں۔
اسٹاپ لسٹ میں حکومتوں میں شامل سیاسی شخصیات و سرکاری افسران، تاجر ، بلڈرز اور صنعت کاروں کے نام بھی کر لئے گئے ہیں ۔ ایف آئی اے ذرائع کے مطابق اسٹاپ لسٹ میں مالی بدعنوانی، ٹیکس چوری، حوالہ ہنڈی کرنسی کے کاروباری میں شامل شخصیات اور ملک میں کرنسی، چینی اور پٹرولیم کی اسمگلنگ میں ملوث افراد کا نام بھی اسٹاپ لسٹ میں شامل ہیں ۔
اسی طرح پی ٹی آئی کو فنڈنگ کرنے والی شخصیات کے نام بھی اسٹاپ لسٹ میں شامل ہیں ۔ ذرائع کا کہنا ہے کہ تمام انٹرنیشنل ایئرپورٹس پر امیگریشن عملے کو اسٹاپ لسٹ میں شامل افراد کو سختی سے روکنے کی ہدایت کر دی گئی ہے ۔
آئی بی ایم سسٹم میں موجود اسٹاپ لسٹ کے علاوہ ہر بین الاقوامی پروازوں کے لئے کچھ نام براہ راست بھی دیئے جاتے ہیں۔
ذرائع نے انکشاف کیا ہے کہ اسٹاپ لسٹ میں پی ٹی آئی حکومت کے حامی متعدد اعلی سرکاری افسران کے نام بھی شامل کر لئے گئے ہیں اور حال ہی میں بیرون ملک جانے والے سندھ کے تین وزراء کے نام اسٹاپ لسٹ میں نہیں تھے۔