صاف و شفاف انتخابات الیکشن کمیشن کی ذمہ داری ہے، نگراں وزیراطلاعات کی کراچی پریس کلب آمد
کراچی:نگراں وفاقی وزیر اطلاعات و نشریات مرتضیٰ سولنگی نے کہا ہے کہ حلقہ بندیاں 30جنوری تک ہوجائیں گی۔ آئندہ دنوں میں پیٹرولیم مصنوعات کی سستی ہوجائیں گی۔ ملک کو منتخب نمائندے چلائیں گے، چوری کے خلاف اقدامات سے تقریباً 8 ارب روپے کی ریکوریاں ہوئی ہیں۔ نگراں حکومت کے انتظامی اقدامات سے ڈالر کی قدر کم ہوئی ہے جس کا اثر پٹرولیم مصنوعات کی خریداری پر بھی پڑتا ہے، آئین کے آرٹیکل 218(3) کے تحت آزادانہ، منصفانہ، شفاف اور غیر جانبدارانہ انتخابات کرانے کی ذمہ داری الیکشن کمیشن کے پاس ہے۔ان خیالات کا اظہار انہوں نے ہفتہ کو یہاں کراچی پریس کلب کے دورہ کے موقع پر پریس کانفرنس سے خطاب کرتے ہوئے کیا۔
اس موقع پر پرنسپل انفارمیشن آفیسر محمد عاصم کھچی بھی موجود تھے۔ نگراں وفاقی وزیر اطلاعات مرتضیٰ سولنگی نے کہا کہ کراچی پریس کلب میرا پرانا گھر ہے جو جمہوریت کے ارتقامیں ایک اہم مورچہ رہا ہے۔ انہوں نے کہا کہ کراچی پریس کلب کی ایک تاریخی حیثیت ہے، فکر، علم و دانش کی آزادی اور عوام کے حق حکمرانی میں کراچی پریس کلب کا کردار لائق تحسین ہے، دور آمریت میں بھی کراچی پریس کلب سے جمہوریت کیلئے توانا آواز ابھری، آج بھی پاکستان کے محنت کش، مظلوم عوام اپنا دکھ درد سنانے کراچی پریس کلب آتے ہیں۔ مرتضیٰ سولنگی نے کہا کہ صحافیوں کے مسائل سے آگاہ ہیں، ان کی ملازمتوں سے متعلق مسائل موجود ہیں۔
انہوں نے کہا کہ موجودہ نگران حکومت آئین کے آرٹیکل 224 کے تحت ایک آئینی و قانونی حکومت ہے، ہمارے دور میں صحافیوں کے ساتھ ناانصافی نہیں ہو سکتی۔ انہوں نے کہا کہ صحافیوں کے مسائل کے حل کے لئے پرنسپل انفارمیشن آفیسر کے ساتھ مل کر اقدامات اٹھائے جائیں گے۔ ایک سوال کے جواب میں نگران وفاقی وزیر اطلاعات نے کہا کہ الیکشن کمیشن نے جنوری کے آخری ہفتے میں انتخابات کے انعقاد کا اعلان کیا ہے.الیکشن کمیشن بااختیار آئینی ادارہ ہے، اس کی ذمہ داری ہے کہ ملک کے اندر آزادانہ، شفاف اور غیر جانبدارانہ انتخابات کا انعقاد کرائے۔ انہوں نے کہا کہ نگران حکومت الیکشن کمیشن کی ہر طرح سے مدد کرے گی اور الیکشن کمیشن کی تمام ضروریات پوری کی جائیں گی۔
انہوں نے کہا کہ عام انتخابات کے انعقاد میں اپنا بھرپور کردار ادا کریں گے، 30 نومبر تک حلقہ بندیاں مکمل ہو جائیں گی.اس کے بعد الیکشن کی حتمی تاریخ بھی دے دی جائے گی۔ پٹرولیم مصنوعات کی قیمتوں سے متعلق سوال کے جواب میں نگران وفاقی وزیر اطلاعات نے کہا کہ پٹرولیم مصنوعات کی قیمتوں کا تعین عالمی مارکیٹ میں موجود قیمتوں سے ہوتا ہے، موجودہ نگران حکومت کے انتظامی اقدامات کی وجہ سے ڈالر کی قدر کم ہوئی ہے جس کا اثر پٹرولیم مصنوعات کی خریداری پر بھی پڑتا ہے، امید ہے کہ آئندہ دنوں میں پٹرولیم مصنوعات کی قیمتوں میں کمی واقع ہوگی.میڈیا ورکرز اور صحافیوں کو تنخواہوں کی عدم ادائیگی سے متعلق سوال پر نگران وفاقی وزیر اطلاعات نے کہا کہ جو میڈیا ہاوسز اپنے ملازمین کو تنخواہیں ادا نہیں کریں گے انہیں سرکاری اشتہار جاری نہیں کئے جائیں گے۔
ایک اور سوال پر انہوں نے کہا کہ بجلی چوری کی مد میں تقریباً 8 ارب روپے کی ریکوری ہوئی ہے، بجلی چوری کی وجہ سے دیگر صارفین پر بوجھ پڑتا ہے، اس نظام کو درست کرنے کی ضرورت ہے۔ایک سوال کے جواب میں نگران وفاقی وزیر نے کہا کہ اگر کسی کو الیکشن کمیشن کے حوالے سے تحفظات ہیں تو اس کے لئے قانون اور عوام کی عدالتیں کھلی ہیں۔ ہمارا اختیار اور مدت محدود ہے، ہم ملکی معیشت کو مستحکم کرنا چاہتے ہیں۔ ہم اپنے حلف کی پاسداری کریں گے۔ انتخابات کے دوران پاکستان کی تمام رجسٹرڈ سیاسی جماعتوں کو مساوی مواقع فراہم کئے جائیں گے۔
وفاقی وزیر اطلاعات مرتضیٰ سولنگی نے مزید کہا ہے کہ دنیا اخبار اور دیگر اخبارات سے نکالے گئے میڈیا ورکرز کے حوالے سے ہم اے پی این ایس اور میڈیا مالکان سے رابطے میں ہیں۔ جواخبارات اور ٹی وی چینل بند ہوچکے ہیں ان کے سرکاری اشتہارات بند کیے جائیں گے، ان کو میڈیا لسٹ سے خارج کیا جائے گا اگر ان کو اشتہارات مل رہے ہیں تو یہ بڑا فراڈ اور زیادتی کی بات ہے، جو اخبارات اور ٹی وی چینل ملازمین کو تنخواہیں نہیں دیتے ان کو سرکاری اشتہارات جاری نہیں کیے جائیں گے۔ ایسے اداروں کی نشاندہی میڈیا ورکرز کو بھی کرنی پڑے گی،صحافیوں کو ہیلتھ انشورنس کارڈ کی سہولیات جلد فراہم کی جائیں گی۔
اس سے قبل کراچی پریس کلب آمد پر پریس کلب کے صدر سعید سربازی اور سیکریٹری کراچی پریس کلب شعیب احمد و دیگر نے ان کا خیر مقدم کیا۔ انہوں نے وزیر اطلاعات کو آگاہ کیا کہ چند گھنٹوں کے نوٹس پر دنیا اخبار کراچی کا پورا دفتر ملازمت سے فارغ کردیا گیا ہے،65 سے زائد میڈیا ورکرز بے روزگار ہوگئے ہیں جبکہ دنیا اخبار کو سرکاری اشتہارات تسلسل سے جاری کئے جارہے ہیں جو صحافیوں کے ساتھ زیادتی ہے، ایسے تمام اخبارات کو سرکاری اشتہارات اور واجبات کی ادائیگی بند کردینا چاہیے جو میڈیا ورکرز کو جبری برطرف کررہے ہیں۔
میڈیا مالکان اپنے ورکرز کو اعتماد میں لئے بغیر ٹی وی چینلز کی خرید و فروخت میں مصروف ہیں۔ بول ٹی وی سمیت تمام میڈیا مالکان کو اپنے میڈیا ورکرز کی تنخواہیں اور واجبات کی بروقت ادائیگی کا پابند بنانا چاہیے،وفاقی وزیر اطلاعات مرتضی سولنگی نے کہا کہ عمران خان کے نام لینے پر کوئی پابندی نہیں ہے، ہماری حکومت نگراں ضرور ہے لیکن ہم غیر آئینی نہیں ہے، ہم صحافیوں کی فلاح و بہبود کے لیے خصوصی اقدامات کررہے ہیں، میڈیا مالکان اور ان کی تنظیموں کے ساتھ مل کر کوئی لائحہ عمل تیار کریں گے جس سے میڈیا ورکرز کو ریلیف فراہم کیا جائے۔
بعد ازاں نگراں وفاقی وزیر اطلاعات و نشریات مرتضیٰ سولنگی نے آرٹس کونسل آف پاکستان کراچی کا دورہ کیا۔ آرٹس کونسل کے صدر احمد شاہ نے نگران وفاقی وزیر اطلاعات کا آرٹس کونسل پہنچنے پر استقبال کیا۔