کراچی : پاکستان پیپلز پارٹی کے رہنما شرجیل انعام میمن نے کہا ہے کہ آج تک کبھی شفاف الیکشن میں مسلم لیگ (ن) کو اقتدار نہیں ملا، ن لیگ ہمیشہ دھاندلی کے ذریعے اقتدار میں آئی، اصل انتخابات سندھ میں نہیں بلکہ سینٹرل پنجاب میں ہونگے، پنجاب میں پی پی کامیابی حاصل کرے گی اور اگلے وزیر اعظم کا ڈومیسائل انشااللہ صوبے سندھ سے ہوگا، پارٹی کل تھر میں جلسہ کرے گی۔
بلاول ہاؤس کراچی میں پریس کانفرنس کرتے ہوئے شرجیل میمن کا کہنا تھا کہ آنے والا سال پیپلز پارٹی کا سال ہوگا۔ پیپلز پارٹی کی سندھ حکومت نے بہت کام کیے ہیں، جبر و ظلم برداشت کیے لیکن میدان کبھی نہیں چھوڑا۔انہوں نے کہا کہ سیاسی قائد کا کام ہوتا ہے کہ وہ ہمیشہ عوام میں رہے، ماضی کی روایتیں سب کے سامنے ہیں۔
انہوں نے کہا کہ سندھ میں ایس آئی یو ٹی جیسے رول ماڈل ہسپتال موجود ہیں۔ مسلم لیگ ن نے پنجاب میں ایک اسپتال تک نہیں بنایا۔، سندھ کے دیہی خواہ شہری علاقوں میں پیپلز پارٹی نے کام کروائے، پیپلز پارٹی نے ہمیشہ تاریخی کام کئے ہیں، پیپلز پارٹی سندھ میں اکیس لاکھ لوگوں کو گھر بنا کر دے رہی ہے، بارشیں تو پنجاب میں بھی ہوئی تھیں، مسلم لیگ ن بتائے کہ انہوں نے پنجاب میں کتنے لوگوں کو گھر بنا کر دیئے ہیں۔
شرجیل انعام میمن نے کہا کہ اسلامی ٹچ کے دعوے کرنے والا عمران خان مسلمانوں کی شہادتوں پر خوشیاں منا رہا ہے،
پی ٹی آئی حکومت نے ملک کی معیشت تباہ کر دی، 2018 میں پاکستان پر ایک نااہل کو تھوپا گیا تھا، ہم نہیں چاہتے کہ 2024 میں بھی ملک پر ایسے لوگ تھوپے جائیں تو ملک کی فلاح و بہبود نہیں چاہتے اور مشکل وقت میں عوام کو چھوڑ کر بیرون ملک چلے جاتے ہیں، 2024 کے انتخابات میں عوام کا ووٹ فیصلہ کرے گا اور کوئی نااہل شخص ملک پر تھوپا نہیں جائے گا۔ نااہل جماعتوں کو عوام مسترد کردیں گے۔عوام کی رائے کے بعد کوئی نااہل ملک پر نہیں تھوپا جائے گا۔
انکا کہنا تھا کہ سندھ میں برسات کے موقع پر آنے والے ہمیشہ سندھ کو لوٹ کر جاتے ہیں۔ مسلم لیگ (ن) کو صرف الیکشن کے دنوں میں ہی سندھ یاد آتا ہے، جب بھی مسلم لیگ ن اقتدار میں ہوتی ہے تو ان کو سندھ کا کوئی خیال نہیں آتا۔
شرجیل انعام میمن نے کہا کہ عام انتخابات کے بعد وزیراعظم پیپلز پارٹی کا ہوگا، سندھ میں ہر الیکشن کے دوران پاکستان پیپلز پارٹی کے خلاف اتحاد بنانے کی کوشش کی جاتی ہے، صفر جمع صفر کا نتیجہ صفر ہی ہوتا ہے، سندھ میں برسات کے موقعے پر آنے والے ہمیشہ ناکام ہوتے ہیں۔ اس بار مقابلہ دیہی سندھ کے ساتھ شہری سندھ میں بھی نہیں، آئندہ الیکشن میں مقابلہ سندھ نہیں وسطی پنجاب میں ہوگا۔
انکا کہنا تھا کہ پیپلز پارٹی کی حکومت نے ملک میں تاریخی کام کیے ہیں۔ بلاول بھٹو نے ملک کو پہچان دی ہے۔ ہماری جماعت کہتی ہے ہمیں ایڈ نہیں ٹریڈ چاہیے۔انہوں نے یہ بھی کہا کہ اقتدار میں وہی جماعتیں آئیں گی جو عوام کے درمیان ہوں گی۔ آج تک کبھی شفاف الیکشن میں مسلم لیگ (ن) کو اقتدار نہیں ملا۔ مسلم لیگ (ن) ہمیشہ دھاندلی کے ذریعے اقتدار میں آئی۔انکا کہنا تھا کہ چاہتے ہیں ماضی کی تلخیوں کو بھلا کر آگے چلا جائے۔ تقسیم کی بات پی ٹی آئی، مسلم لیگ ن اور کراچی کی جماعت نے کی۔
شرجیل انعام میمن نے کہا کہ پیپلز پارٹی نے ہمیشہ ملک کو جوڑنے کی بات کی ہے۔ اقتدار کی ہوس کےلیے بھائی کو بھائی سے لڑانے کی سیاست نہیں کی۔ مسلم لیگ (ن) ڈیڑھ سال میں معیشت ٹھیک کرنے میں ناکام ہوئی، پنجاب میں مسلم لیگ ن اتنی ناکام ہو چکی ہے کہ لوگ وہاں سے علاج کے لئے سندھ آتے ہیں، جگر اور گردے کے ٹرانسپلانٹ کے لئے لوگ پہلے بھارت جاتے تھے لیکن اب سندھ آتے ہیں، صحت کے شعبے میں ماسوائے پیپلز پارٹی کے کسی بھی جماعت نے گراں قدر خدمات سرانجام نہیں دی ہیں۔
انہوں نے کہا کہ آصف علی زرداری کا دل بہت بڑا ہے، انہوں نے دنیا پر احسانات کئے ہیں، جب عمران خان بول رہے تھے کہ ان کی حکومت کو وائیٹ ہاؤس نےگرایا ہے تو اس وقت بھی آصف علی زرداری کہہ رہے تھے کہ عمران خان کی حکومت وائیٹ ہاؤس نے نہیں بلاول ہاؤس نے گرائی ہے۔
شرجیل انعام میمن نے کہا کہ پی ڈی ایم کا اتحاد بلاول بھٹو زرداری نے بنوایا تھا، پی ڈی ایم بننے سے پہلے مسلم لیگ ن کی قیادت تو بیان بھی نہیں دے سکتی تھی، لیکن بعد ازاں پی ڈی ایم میں سازشیں شروع ہو گئیں اور ہمیں اسمبلیوں سے مستعفی ہونے کا کہا گیا، پیپلز پارٹی نے سیاسی بصیرت کا مظاہرہ کرتے ہوئے اس کی مخالفت کی ، اگر ہم اسمبلیوں سے مستعفی ہو جاتے تو عمران خان کو پانچ سال حکومت کرنے کا موقعہ مل جاتا اور ملکی معیشت مکمل طور پر تباہ ہو جاتی۔
انہوں نے کہا کہ ہماری مسلم لیگ ن اور ایم کیو ایم سے کوئی دشمنی نہیں ہے ، آصف علی زرداری صاحب نے سب کو اکٹھا کیا اور آصف علی زرداری صاحب نے ایک جمہوری طریقے سے ایک وزیر اعظم کو گھر بھیجا، سندھ میں مسلم لیگ ن ، جی ڈی اے سے اتحاد کرے یا کسی اور سے ، جتنے بھی اتحاد بنانے ہیں بنالیں لیکن سندھ میں پیپلز پارٹی کلین سوئیپ کرے گی۔
شرجیل انعام میمن نے کہا کہ لاہور کے پی ایم ایل این کے جلسے میں ہونے والا خطابات ان کے ہی وزیر خزانہ اور وزیر اعظم کے خلاف تھے۔
انہوں نے کہ پیپلز پارٹی پاکستان کو معاشی خواہ دفاعی میدان میں بچائے گی، پیپلز پارٹی نے کبھی 90 کی دہائی کی سیاست دہرانے کی کوشش نہیں کرے گی، 2008 سے 2013 تک پیپلز پارٹی کے دور حکومت میں کوئی ایک بھی سیاسی قیدی نہیں تھا۔
پریس کانفرنس کے وقعے پر پاکستان پیپلز پارٹی کے رہنما شرجیل انعام میمن نے ہندو برداری کو دیوالی کے موقعے پر مبارکباد بھی دی۔
